ბარეთის სკოლის ინიციატივა

ბარეთის საჯრო სკოლის სამოქალაქო კლუბის „ჩვენ“ წევრები ტელევიზიით გასულმა რეპორტაჟმა ლეიკემიით დაავადებულებზე   მიიყვანა იმ აზრამდე, რომ დახმარებოდნენ 8 წლის თენგო ზააკაშვილს.

ამისათვის 25 თებერვალს კლუბმა შეიმუშავა გრძელვადიანი პროექტი „ჩვენ თქვენთან ვართ“, რომლის მიზანი იყო სამოქალაქო შეგნების ამაღლება და მოსწავლე-მასწავლებელ-მშობლის მონაწილეობა საქველმოქმედო ღონისძიებაში თემის წარმომადგენლებთან ერთად. პროექტი 3 კვირის მანძილზე მიმდინარეობდა.  

27 თებერვალს სამოქალაქო განათლების პედაგოგებმა და კლუბის წევრებმა სკოლის მოსწავლეებს და თემის წევრებს ჩაუტარეს სემინარი ამ სენზე და ქველმოქმედების არსზე. გამოცხადდა კონკურსები: მოსწავლეებს უნდა დაეწერათ ამ პრობლემის შესახებ თემა, შეექმნათ ხელნაკეთი ნამუშევრები და ნახატები.

7 მარტს საბაზო საფეხურის მოსწავლეებმა წარმოადგინეს ნახატები და ხელნაკეთი ნივთები, რომლებიდანაც საუკეთესოები ამოირჩა.

11 მარტს საშუალო საფეხურის მოსწავლეებმა წარმოადგინეს თემები , რომლებიდანაც ორი მათგანი  „მე სიცოცხლე მწყურია“ (ანა ფირცხელიანი) და „ისევ აშრიალდა პალმა“ (ლევან გურჩიანი) გამოცხადდა საუკეთესო ნამუშევრებად.

13 მარტს გაიმართა პროექტის შემაჯამებელი ღონისძიება, რომელზეც დამსწრე საზოგადოებისთვის წაკითხულ იქნა საუკეთესო თემები.  მოეწყო ვიქტორინა „რა, სად, როდის“ თემაზე „ვინ რა იცის ლეიკემიაზე“. ამ დღესვე მოეწყო გამარჯვებული ნახატებისა და ხელნაკეთი ნივთების გამოფენა-გაყიდვა, რის შედეგად შეგროვებულმა თანხამ შეადგინა 308 ლარი, რომელიც გადაიგზავნა  თენგო ზააკაშვილის პირად ანგარიშზე.

პროექტში მონაწილეობა მიიღეს  სამოქალაქო კლუბის  წევრებმა და  VI-XII კლასების ყველა მოსწავლემ, სულ 80 მოზარდმა და  სკოლის 18 პედაგოგმა. დასკვნით ღონისძიებას თემის 5 წარმომადგენელიც დაესწრო. 

„ჩვენი მიზანია, მცირე წვლილი შევიტანოთ ლეიკემიით დაავადებული ბავშვების დასახმარებლად. ჩვენი დღევანდელი აქცია-ღონისძიება სტიმული იქნება სხვა სკოლებისთვისაც მსგავსი აქციები ჩაატარონ და დაეხმარონ ამ ბავშვებს“ - განაცხადა სკოლის სამოქალაქო კლუბის წევრმა  ანა ფიცხელიანმა.

„ჩვენ შევიძინეთ ბავშვის ნაშრომი, რომელიც სუვენირის სახით გვექნება. ჩვენი შენაძენით მცირე წვლილი შევიტანეთ ლეიკემიით დაავადებული ბავშვების დასახმარებლად“ - რაულ აბულაძე, წალკის მკვიდრი.

პროექტი ამით არ დასრულებულა. 29 მარტს ბარეთის სკოლის პედაგოგები და თემის წარმომადგენლები ეწვივნენ იაშვილის კლინიკაში სისხლის ჩასაბარებლად. ბარეთის სკოლას ამ ინიციატივაში მხარი აუბა ნეო ხარაბის საჯარო სკოლამაც, რომლის პედაგოგებმა  ბარეთელ  კოლეგებთან ერთად  გაიღეს სისხლი. სულ ბარეთის 5 პედაგოგმა და 1 თემის წევრმა, ხოლო ნეო ხარაბადან 11 პედაგოგმა ჩააბარა სისხლი.

„გაუზიარე გამოცდილება თანატოლებს“

ბარეთის საჯარო სკოლას ჰქონდა გასვლითი ღონისძიება სამების საჯარო სკოლაში, სახელწოდებით  „გაუზიარე გამოცდილება თანატოლებს“ . ღონისძიების ორგანიზატორი გახლდათ სამოქალაქო განათლების მასწავლებელი ინეზა კორძაია. 

ღონისძიების ფარგლებში ბარეთის საჯარო სკოლის სამოქალაქო კლუბის წევრ მოსწავლეებმა თანატოლებს სამების საჯარო სკოლიდან ჩაუტარეს ტრენინგ–სემინარი თემებზე:

1) ბავშვების უფლება–მოვალეობები; 

2) გენდერული თანასწორობა; 

3) ოჯახში ძალადობის მსხვერპლი და სხვა აქტუალური თემები. 

მასპინძელი სკოლის მოსწავლეები ჯგუფურ მუშაობაში აქტიურად იყვნენ ჩართული. 

აღსანიშნავია, რომ მსგავსი ღონისძიებები ხელს უწყობს სხვადასხვა თემის მოსწავლეების დაახლოებას და გამოცდილების გაზიარებას.

კლუბ "აისის" პროექტი "დავასუფთაოთ ფერისცვალების ეკლესია"

ქ.წალკის #1 საჯარო სკოლის სამოქალაქო კლუბმა "აისი" განახორციელა პროექტი "დავასუფთაოთ ფერისცვალების ეკლესია", რომლის მიზანი იყო აღნიშნული სამლოცველოს დალაგება-დასუფთავება. ფერისცვალების ეკლესიაში ამჟამად არ აღევლინება წირვა-ლოცვა. პროექტში მონაწილეობას იღებდნენ სამოქალაქო კლუბ "აისის" წევრი მეათე კლასელები. მათ დაალაგეს სამლოცველო და დაასუფთავეს ეკლესიის ეზო.
სურათები შეგიძლიათ იხილოთ ბლოგზე http://kakhiani.blogspot.com/

სოფ.ოზნის საჯარო სკოლის საინიციატივო ჯგუფი

"სამოქალაქო განათლებისა და პედაგოგთა გადამზადების პროგრამის" ფარგლებში სოფ.ოზნის საჯარო სკოლაში პედაგოგ ასლი ბადასიანის ხელმძღვანელობით შეიქმნა საინიციატივო ჯგუფი, რომელმაც განახორციელა რამოდენიმე აქტივობა.

• ივლისში სოფლის სტადიონის მშენებლობაზე ოზნის სკოლის 10 მოსწავლე მოხალისეობრივად 5-6 საათს მუშაობდა, არდადეგების დასრულების შემდეგ, სწავლის პერიოდში კი მხოლოდ შაბათ-კვირას.
• 28 სექტემბერს სკოლის მნესა და დარაჯს საინიციატივო ჯგუფის 15 წევრი დაეხმარა სკოლის ეზოდან შეშის საწყობში შეტანაზე. ამავე დღეს მოეწყო  სკოლის ეზოს დასუფთავების აქცია, რომელშიც 10 მოსწავლე და პედაგოგი ასლი ბადასიანი მონაწილეობდნენ.
• ოქტომბერში პედაგოგი და 4 მოსწავლე კარტოფილის მოსავლის აღებაში დაეხმარნენ თემის მოხუცებულ წევრს.

საინიციატივო ჯგუფის წევრები აპირებენ კლუბის შექმნას და პროგრამაში უფრო აქტიურად ჩართვას.

სიუჟეტი წალკაზე

16 ივნისს წალკის #1 საჯარო სკოლის სამოქალაქო კლუბის "აისი" წევრებმა ინტერვიუები აიღეს  წალკის მოსახლეობისგან და მოამზადეს სიუჟეტი წალკის შესახებ.

მცირე გრანტების კონკურსის პრეზენტაცია წალკაში

16 სექტემბერს სამოქალაქო განათლებისა და პედაგოგთა გადამზადების პროგრამის ფარგლებში სიქამ - საგანმანათლებლო ინიციატივების ქართულმა ასოციაციამ წალკის #1 სკოლაში ჩაატარა საკონსულტაციო შეხვედრა მცირე გრანტების კონკურსთან დაკავშირებით,  რომლის დედლაინი 8 ოქტომბერსაა. შეხვედრას ესწრებოდა პროგრამაში ჩართული წალკის მუნიციპალიტეტის 8 სკოლის (წალკის #1, თრიალეთი, ბარეთი, ნარდევანი, ხაჩკოვი, ოზნი, აშკალა, კიზილ-ქილისი)  40 წარმომადგენელი, მათ შორის  4 დირექტორი, 9 პედაგოგი და მოსწავლეები.

შეხვედრის მონაწილენი გაეცნენ სამოქალაქო განათლების პროგრამის მიმდინარეობას და მცირე გრანტების შეტანის პირობებსა და წესებს, თუ როგორ უნდა შეავსონ აპლიკაცია და რა სახის დოკუმენტაცია ესაჭიროებათ მათ ამისთვის.

ასევე წალკის #1 საჯარო სკოლას გადაეცა საკანცელარიო ნივთები 15 სექტემბერს ჩატარებული სამოქალაქო აქტივობაში ჩართვისთვის: „გავაკეთოთ ეს ქვემო ქართლში“.

დამსწრე სკოლის წარმომადგენლები დიდი ინტერესით შეხვდნენ მორიგ საგრანტო კონკურსს და  ყველა იმ დაგეგმილ აქტივობებს, რაც სიქამ ამ პროგრამის ფარგლებში წარუდგინა. 

პროგრამის პრეზენტაცია წალკის რაიონის სოფ.ბაშქოის სკოლის წარმომადგენლებთან

22 მარტს წალკის №1 საჯარო სკოლაში შედგა პროგრამის პრეზენტაცია, რომელსაც ესწრებოდნენ წალკის რაიონის სოფ. ბაშქოის საჯარო სკოლის წარმომადგენლები: დირექტორი ნინო წიფიანი და სამოქალაქო განათლების პედაგოგი ინეზა კორძაია. მათ მიეწოდათ ინფორმაცია პროგრამის მიმართულებების შესახებ და გადაეცათ პროგრამის პოსტერი, პროგრამის დეტალური აღწერა და სამაგიდო კალენდრები.